«Ո՞վ է նրան այդ իրավունքը տվել». անչափահասին տուգանել ու իջեցրել են ավտոբուսից

Երևանի հանրային տրանսպորտում վերահսկողություն իրականացնող աշխատակիցների գործողությունները հերթական անգամ հանրային դժգոհության ալիք են բարձրացրել։ Դեպքի առնչությամբ Tribune.am-ի հետ զրույցում իրենց վրդովմունքն են հայտնել անչափահաս աղջիկն ու նրա հայրը՝ սուր քննադատության ենթարկելով Հասարակական կարգի պահպանության ծառայության տարածքային առաջին բաժնի առաջին կարգի մասնագետ Մարիանա Էլբակյանի գործողությունները։

Աղջկա հայրը մեզ հետ զրույցում, անդրադառնալով աշխատակցի վերաբերմունքին ու իրավասություններին, նշեց․ «Անչափահաս երեխային տուգանում են, հերիք չէ, մի հատ էլ ավտոբուսից իջեցնում են։ Ո՞վ է նրան այդ իրավունքը տվել»։

Tribune.am-ը զրուցել է նաև դեպքի կենտրոնում հայտնված անչափահաս աղջկա հետ, ով ներկայացրեց միջադեպի ընթացքն ու իրենց խոսակցությունը վերահսկողի հետ․ «Ես իրենց ասացի, որ հայրիկս հիմա գումարը կփոխանցի, և ես անմիջապես կվճարեմ երթևեկության համար։ Սակայն իմ խոսքերին ընթացք չտվեցին, մերժեցին սպասել, տուգանեցին ինձ ու ասացին, որ իջնեմ ավտոբուսից»։ Նրա խոսքով՝ տեղի ունեցածն իր համար եղել է լուրջ ստրես։

Արամ Դավթյան