Չեչնիայի Հանրապետության Անվտանգության խորհրդի քարտուղար Ադամ Կադիրովը հայտարարել է, որ Ուկրաինայի նախագահ Վլադիմիր Զելենսկուն կգտնեն և կբերեն Գրոզնի։ Այդ մասին նա գրել է Instagram-ում՝ պնդելով, որ Զելենսկուն կբերեն ոչ թե որպես պետության ղեկավար, այլ որպես «ռազմական հանցագործ»։
«Եթե Ռուսաստանի նախագահ Վլադիմիր Վլադիմիրովիչ Պուտինը կամ հայրս նման հրահանգ տան, մենք Զելենսկուն կգտնենք աշխարհի ցանկացած կետում․ դա պարզապես ժամանակի հարց է։ Մենք կգանք և կտանենք ձեզ՝ ոչ թե որպես նախագահ, այլ որպես ռազմական հանցագործ»,- գրել է Կադիրովը։
Գրառման մեջ նա նաև Զելենսկուն անվանել է «ծաղրածու» և «ոչ ոք»։ Նա պնդել է, որ Ուկրաինայի նախագահի ժամանակը շուտով կավարտվի, և նրա «ներկայացման» եզրափակիչը հեռու կլինի կատակերգական լինելուց։
Ավելի վաղ Չեչնիայի ղեկավար Ռամզան Կադիրովը հայտարարել էր, որ Զելենսկու՝ իրեն առևանգելու կոչերը վկայում են հակամարտության խաղաղ կարգավորման խաթարման փորձերի մասին։ Նրա խոսքով՝ նման հայտարարությունները նվաստացուցիչ են հենց Ուկրաինայի նախագահի համար։
