«Հրապարակ» թերթը գրում է. «Երեկ գրել էինք, որ ոստիկանության զորքերի հրամանատար, գեներալ Հայկ Բաբայանը, որը երազում է նորաստեղծ գվարդիայի ղեկավար դառնալ, շուրջ 4 տարի` 2015- 2019 թթ., պետությունից բնակարանային վարձի փոխհատուցում է ստացել` չունենալով դրա իրավունքը:
Ըստ օրենքի, բնակավայրից 30 և ավելի կիլոմետր հեռու ծառայող ոստիկաններին պետությունն ամսական 65 հազար դրամ է տրամադրում: Բաբայանն ապրում է Գառնիում, որը Երևանից հեռու է 25-27 կմ: Հիմա էլ նա ապրում է Գառնիում, աշխատում` Երևանում, բայց 2019-ից դադարեցրել է դոտացիա ստանալը. երևի ասել են՝ կբացվի, որ օրենքի խախտում է: Այս դեպքով անգամ ՆԳՆ ներքին անվտանգության վարչությունը ծառայողական քննություն է նշանակել, որն արագ կարճվել է՝ ՔՊ-ում ունեցած «լավ ախպերների» շնորհիվ։
Հայկ Բաբայանը, որն այս տարիներին համակարգել է սև բերետավորների հարձակումները ցուցարարների վրա, նռնակների նետումից մինչև ծեծուջարդ, պարզվում է` ծանր է տարել մեր հրապարակումը և կառչել է տեխնիկական վրիպակից, որը տեղ էր գտել երեկվա հրապարակման մեջ` նա 4 տարվա ընթացքում 3 միլիոն դրամից ավելի գումար է ստացել պետությունից, որը ցավալի տեխնիկական վրիպակի պատճառով մեկ 0 ավելի էր գրվել` 30: Ճիշտ է` հրապարակումից րոպեներ անց վրիպակն ուղղել ենք, սակայն Բաբայանը կապվել է իշխանական կայքերի հետ և հերքել տվել մեր հրապարակումը, թե ինքը 30 միլիոն չի ստացել պետբյուջեից:
Զավեշտալին այն է, որ Բաբայանը չի հերքել իրեն բնակվարձ տալու փաստը, այլ միայն գումարի չափը։ Բայց ՀՀ իրավապահներն այս տարիներին 3 միլիոն դրամից շատ ավելի փոքր գումարների յուրացման համար են գործեր հարուցել, հուսանք՝ սա էլ անհետևանք չեն թողնի, և նոր նախարար Արփինե Սարգսյանն էլ սրանով կզբաղվի»։
