YouTube տեսածառայությունն այլևս թույլ չի տա իր հարթակում տեղադրել բովանդակություն, որն օգտատերերին ուղղորդում է դեպի չհաստատված կայքեր՝ մոլախաղերով, սպորտային խաղադրույքներով: YouTube-ը չհաստատված է համարում այն կայքերը, որոնք խախտում են տեղական օրենքները և չեն ստուգվել YouTube-ի կամ Google-ի կողմից: Այս մասին տեսածառայությունը հայտնել է ծրագրավորողների համար էջում։ Փոփոխություններն ուժի մեջ կմտնեն մարտի 19-ից։
Բացի չհաստատված կայքերի հղումներից, YouTube-ում թույլ չի տրվի հրապարակել բովանդակություն այնպիսի պատկերներով, տեքստերով, տարբերանշաններով կամ հայտարարություններով, որոնք կարող են ուղղորդել խաղային բովանդակությամբ կայքեր մուտք գործելու համար:
Փոփոխություններն ընդլայնում են YouTube-ի գործող քաղաքականությունը, որն արգելում է հղումներ տեղադրել այն կայքերին, որոնք խախտում են տեսածառայության կանոնները: Բացի այդ, YouTube-ը ներդրել է տարիքային ստուգման գործառույթ՝ առցանց խաղատների գովազդ պարունակող բովանդակությանը հասանելիություն ստանալու համար: Այժմ 18 տարեկանից ցածր օգտատերերը չեն կարողանա դիտել առցանց խաղատներ, սպորտային խաղադրույքների կայքեր գովազդող բովանդակություն:
