«Զանգեզուրի միջանցքը» օգուտ կբերի ոչ միայն Ադրբեջանին, Հայաստանին և Թուրքիային, այլև տարածաշրջանի մյուս երկրներին. այս մասին հայտարարել է Թուրքիայի նախագահ Ռեջեփ Թայիփ Էրդողանը։
«Մենք այս երթուղին համարում ենք չափազանց կարևոր՝ իր աշխարհատնտեսական նշանակության պատճառով։ Այն կապելու է ոչ միայն մեր տարածաշրջանը, այլև դրանից դուրս գտնվող աշխարհագրական տարածքները՝ խթանելով առևտուրը»,-ասել է նա։
Էրդողանը հույս է հայտնել, որ երթուղին չի դառնա լարվածության պատճառ։ «Մեր հիմնական սպասելիքն այն է, որ այս միջանցքը վեճերի աղբյուր չդառնա, այլ վերածվի համագործակցության խորհրդանիշի։ Այդպիսով, տարածաշրջանը կդառնա բարգավաճման գոտի, որտեղ գերակայում է համագործակցությունը։ Մենք՝ որպես տարածաշրջանի երկրներ, կարող ենք լուծել այս հարցը կոնսենսուսի միջոցով», – ընդգծել է Էրդողանը։
Թուրքիայի ղեկավարը նշել է, որ Ադրբեջանի ղեկավարությունն ունի հստակ շահագրգռվածություն միջանցքի գործարկման հարցում․«Ադրբեջանի Հանրապետության նախագահ Իլհամ Ալիևը մեծ կարևորություն է տալիս Զանգեզուրի միջանցքին։ Նա ցանկանում է հնարավորինս արագ պատրաստել այն և օգտագործել ինչպես Ադրբեջանի, այնպես էլ ամբողջ տարածաշրջանի օգտին։ Վստահ եմ, որ մենք միասին կլուծենք այս հարցը»,- ընդգծել է Էրդողանը։
