Արթիկում Հայրենական Մեծ պատերազմի զոհերի հուշարձանն ուզում են հանել ու տեղը շատրվաններ տեղադրել։ Այս լուրը տեւական ժամանակ հերքում էին իշխանությունները։ Tribune.am-ի ձեռքի տակ է հայտնվել ԿԳՄՍ նախարար Ժաննա Անդրեասյանի գրությունը՝ հասցեագրված ԱԺ պատգամավոր Մհեր Մելքոնյանին, ըստ որի Շիրակի մարզպետարանի կողմից նախարարություն է ներկայացվել «Արթիկ քաղաքի կենտրոնական հրապարակի պուրակի բարեկարգում եւ Հայրենական Մեծ պատերազմի բազալտբետոնյա հուշարձանի ապամոնտաժում ու մոնտաժում» աշխատանքային նախագիծը։ Առաջարկել են տեղափոխել հուշարձանը, որը «Պատմության եւ մշակույթի անշարժ հուշարձանների ու պատմական միջավայրի պահպանության եւ օգտագործման մասին» օրենքով, կարող են անել բացառիկ դեպքում։
Մինչ այս Tribune.am-ը դեռ մեկ ամիս առաջ՝ փետրվարի 7-ին խոսել է Արթիկի համայնքապետարանի աշխատակազմի հետ, Արթիկ համայնքի ղեկավարի օգնական Սեւակ Պետոյանը մեզ վստահեցրեց․ «Մեր օրակարգում հիմա նմանատիպ հարց չկա։ Եթե նման հարց լինի, այն կդրվի հանրային քննարկման, ինչպես հանրությունը կորոշի, այդպես էլ կվարվենք։ Ներկա պահին Արթիկի համայնքապետարանի օրակարգում նման հարց չկա»։
Այսօր մենք խոսեցինք Արթիկի համայնքապետ Անանիկ Ոսկանյանի հետ։ Թե ինչո՞ւ են ստել ու ապատեղեկացրել, նա ասաց․ «Մենք այն ժամանակ առիթ ունեցանք քննարկելու, ես նախարարի հետ էլ եմ քննարկել, բնակիչների հետ էլ, թե հնարավո՞ր է, եթե մենք ունենանք նմանատիպ ծրագիր, որ հուշարձանը տեղափոխենք, բարեկարգենք ավելի լավ վիճակով, իսկ հուշարձանի տեղը շատրվաններ տեղադրենք, էդ պահին ասեցին, թե օրենսդրական խնդիր կա, պիտի Հուշարձանների պահպանության» հետ քննարկվի, բան․․․ու էդպես սառեցվավ։ Օգնականս ճիշտ է պատասխանել, կոնկրետ էս պահին մեր օրակարգում նման հարց չկա»։
Հարցին՝ բնակիչներն անհանգստացած են, Մայիսի 9–ին ընդառաջ ինչո՞ւ եք ուզում այդ հուշարձանը հանել՝ նա պատասխանեց․ «Չէ, դա ավելորդ չգիտեմ ում հետաքրքրությունն է այդպես տեղաշարժվել, որ կապել են Մայիսի 9–ի հետ, էդ արդեն 3 տարի առաջվա խոսակցություն է եղել ու քննարկվել է, ոչ թե մենակ իմ օրոք է եղել»։
