Ժնևում ավարտվել են Ռուսաստանի, ԱՄՆ-ի և Ուկրաինայի պատվիրակությունների միջև բանակցությունները։ Դրանք տևել են ավելի քան չորս ժամ, հաղորդում է ՌԻԱ Նովոստին՝ հղում անելով աղբյուրին։
Միևնույն ժամանակ, Reuters-ը հաղորդում է, որ Ռուսաստանի, ԱՄՆ-ի և Ուկրաինայի միջև բանակցությունների քաղաքական մասն ավարտվել է։ Գործակալության տվյալներով՝ երկու կողմերի ռազմական ներկայացուցիչները կշարունակեն քննարկումները։
Ռուսական կողմը բանակցություններին ներկայացնում է Ռուսաստանի նախագահի օգնական Վլադիմիր Մեդինսկին։ Պատվիրակության կազմում են նաև փոխարտգործնախարար Միխայիլ Գալուզինը, Զինված ուժերի գլխավոր շտաբի գլխավոր վարչության պետ Իգոր Կոստյուկովը և այլ պաշտոնյաներ։ TASS-ը հաղորդում է, որ Ժնևում ներկա են նաև Իտալիայի, Գերմանիայի, Ֆրանսիայի և Մեծ Բրիտանիայի ներկայացուցիչներ։
ՌԴ նախագահի մամուլի քարտուղար Դմիտրի Պեսկովը նշել է, որ փետրվարի 17-ի հանդիպման մասին լուրեր չպետք է սպասել։ Նա պարզաբանել է, որ աշխատանքները կշարունակվեն հաջորդ օրը։ Կրեմլի տվյալներով՝ բանակցությունների օրակարգը, ենթադրաբար, կներառի թեմաների ավելի լայն շրջանակ՝ համեմատած Աբու Դաբիում կայացած խորհրդակցությունների հետ։ Մասնավորապես, քննարկումը կկենտրոնանա տարածքային հարցի վրա։
