Ընտրություններից մեկ օր առաջ ընդդիմադիր գործիչների նկատմամբ նման գործողությունները լուրջ կասկածի տակ են դնում ազատ և արդար ընտրությունների ապահովման վերաբերյալ իշխանության հայտարարությունները։ Այս մասին հայտարարություն է տարածել Հայաստանի Հանրապետական կուսակցությունը։
«Ժողովրդավարությունից ճառող Նիկոլ Փաշինյանի իշխանությունը ընտրություններից ընդամենը մեկ օր առաջ Մարտունիում հերթական անգամ ցույց է տալիս իր իրական դեմքը։
Այս անգամ թիրախում «Մեր համայնք» դաշինքն է և նրա առաջնորդները, այդ թվում՝ ՀՀԿ Մարտունու շրջանային կազմակերպության ղեկավար, «Մեր համայնք» դաշինքի առաջնորդ Արամ Կարապետյանը։
Ընտրություններից մեկ օր առաջ ընդդիմադիր գործիչների նկատմամբ նման գործողությունները լուրջ կասկածի տակ են դնում ազատ և արդար ընտրությունների ապահովման վերաբերյալ իշխանության հայտարարությունները։
Փաշինյանը պետք է հասկանա՝ Մարտունին սեփական իշխանությունը պահելու փորձադաշտ չէ, իսկ ընդդիմադիրներին կալանավորոլով՝ հնարավոր չէ խուսափել քաղաքական պատասխանատվությունից»:
Ավելի վաղ ՀՀԿ-ն հայտնել էր․
«Այսօր առավոտյան՝ ընտրություններից ընդամենը մեկ օր առաջ, Մարտունիում բերման են ենթարկել ընդդիմադիր «Մեր համայնքը» դաշինքի ներկայացուցիչներին, այդ թվում՝ համայնքի ղեկավարի թեկնածու, ՀՀԿ Խորհրդի անդամ Արամ Կարապետյանին։
Սա դասական քաղաքական հետապնդում է, քաղաքական ռեպրեսիա և ընդդիմության նկատմամբ ահաբեկման դրսևորում։
Ընդդիմադիր լինելը հանցագործություն չէ, իսկ արդար ընտրությունները չեն կարող անցկացվել քաղաքական ճնշումների և վախի մթնոլորտում։
Սա է այն «ազատ, արդար և հավասար» ընտրությունների իրական պատկերը, որի վտանգների մասին բազմիցս բարձրաձայնել ենք։
Ընտրական կեղծիքները, քաղաքական անհավասարությունն ու վարչական ռեսուրսի չարաշահումը դարձել են այս իշխանության քաղաքական գործելակերպի հիմնական գործիքները։
Իշխանությունը, չունենալով ժողովրդի վստահության ամուր հենարան, փորձում է իր քաղաքական խնդիրները լուծել ուժային կառույցների միջոցով՝ պետական համակարգը ծառայեցնելով սեփական իշխանության պահպանմանը։
Քաղաքական մրցակցությունը պետք է որոշվի ժողովրդի քվեով, ոչ թե ուժային կառույցների միջամտությամբ»։
