Ես առաջարկել եմ սպասել 7 րոպե ծանոթանամ արձանագրության բովանդակությանը, ասել եմ՝ ծանոթանալուց հետո կմիջնորդեմ, որ դարպասը բացեն, բայց նրանք բռնի ուժ կիրառեցին, ցանկացան ցույց տալ իրենց ուժը, ցույց տան, որ Արցախի Հանրապետության ներկայացուցչությունը և այստեղ գտնվող մարդիկ որևէ նշանակություն չունեն իրենց համար։
Այս մասին լրագրողների հետ զրույցում ասաց փաստաբան Ռոման Երիցյանը։
«Մեզ ոչ մեքենա առգրավելու որոշում են ցույց տվել, ոչ տեխնիկական միջոցներով մեքենան առգրավելու միջնորդություն, ոչ դրա արձանագրությունը, ոչ դատարանի որոշում։ Քննիչը ներկայացել է, ներս է հրավիրվել, դրանից հետո էլ ոչ մի կերպ չեն հիմնավորել, որ պատրաստվում են բռնի ուժ կիրառելով, դարպասները կոտրելով առգրավել նախագահին սպասարկող մեքենան»,- ասաց նա։
Երիցյանի խոսքով՝ խաբելով ներս են մտել ու տեղեկանալով, որ անվտանգության աշխատակիցը չունի դարպասը բացելու լիազորություն, և, որ դարպասը բացող տեխնիկական միջոցը մոտը չի գտնվում, միանգամից հրավիրել են հատուկջոկատայիններին։
«Արձանագրությունը նոր են կազմել, կծանոթանանք դրան։ Չեն ասել, թե ինչ քրեական վարույթի շրջանակներում, ինչ կապ ունի նախագահին սպասարկող մեքենան այդ քրեական գործի հետ, որևէ պատճառաբանություն չկա։ Ես առաջարկել եմ սպասել 7 րոպե ծանոթանամ արձանագրության բովանդակությանը, ասել եմ՝ ծանոթանալուց հետո կմիջնորդեմ, որ դարպասը բացեն, բայց նրանք բռնի ուժ կիրառեցին, ցանկացան ցույց տալ իրենց ուժը, ցույց տան, որ Արցախի Հանրապետության ներկայացուցչությունը և այստեղ գտնվող մարդիկ որևէ նշանակություն չունեն իրենց համար»,- ասաց նա։
Երիցյանը նշեց նաև՝ թե՛ առգրավման, թե դարպասները կոտրելու, թե առհասարակ բնակարան հանդիսացող տարածքից առանց դատարանի որոշման առգրավում կատարելու գործողությունները հատուկջոկատայինների բողոքարկելու են դատարանում։ «Սա նաև լայնորեն պետք է լուսաբանվի, որ ՀՀ բնակիչներն իմանան, թե ինչ օրի են արժանացնում արցախցիներին։ Սա ապացուցում է, որ արցախցիների նկատմամբ իրականացվում են ճնշումներ»,- հավելեց նա։
Հիշեցնենք, որ այսօր հատուկջոկատայինները կոտրելով Արցախի ներկայացուցչության դարպասները ներս են մտել և առգրավել Արցախի Հանրապետության նախագահ Սամվել Շահրամանյանին սպասարկող ծառայողական մեքենան։
