Եթե իշխող «Վրացական երազանք՝ ժողովրդավարան Վրաստան» կուսակցության հիմնադիր և պատվավոր նախագահ Բիձինա Իվանիշվիլին առաջադրվի երկրի նախագահի պաշտոնում, նա կդառնա Վրաստանի պատմության լավագույն նախագահը. այս մասին լրագրողների հետ զրույցում ասել է Վրաստանի արդարադատության նախարար Ռատի Բրեգաձեն, փոխանցում է ekhokavkaza.com-ը:
ԶԼՄ-ների ներկայացուցիչները նախարարին հարցրել են նախագահի պաշտոնում Իվանիշվիլիի հնարավոր առաջադրման մասին:
«Եթե պարոն Իվանիշվիլին որոշի առաջադրվել նախագահի պաշտոնում, ես վստահ եմ, որ նա կդառնա Վրաստանի պատմության լավագույն նախագահը, թեև չգիտեմ, թե ով կլինի նախագահի թեկնածուն»,- ասել է նախարարը և ընդգծել, որ իշխող կուսակցությունը պատրաստվում է «տպավորիչ հաղթանակի»:
Խոսելով ընդդիմության մասին՝ Բրեգաձեն նշել է.«Ինչ շանսեր կունենա ընդդիմությունը, իհարկե, կախված է ընտրողներից, բայց, նրանց գործողություններից ելնելով, կարծում եմ, որ նրանց հնարավորությունը նվազագույն է։ Նրանց առավելագույնը ընտրական շեմը հաղթահարելն է: Ընդհանուր առմամբ կարծում եմ, որ նրանց համար շատ դժվար կլինի»։
Վրաստանում նախագահական ընտրությունները տեղի կունենան խորհրդարանական ընտրություններից հետո։ Նախագահին ընտրելու է ընտրական խորհուրդը, որի կազմում կլինեն խորհրդարանի անդամներ և տեղական ինքնակառավարման մարմինների ներկայացուցիչներ։
