Երեկ Ամենայն Հայոց Կաթողիկոսի և Ռոբերտ Քոչարյանի կողմից առաջնորդվող Շարժման մասնակիցների կողմից տեղի է ունեցել հարձակում ոստիկանների վրա։ Այս մասին ԱԺ-ում հայտարարեց ՀՀ վարչապետ Նիկոլ Փաշինյանը, ում համոզմամբ՝ ոստիկանության հակազդեցությունը եղել է իրավաչափ և պրոֆեսիոնալ, իսկ նմանատիպ բոլոր դեպքերում ոստիկանությունը գործելու է նույն կերպ։
«Ցուցարարները փորձել են բռնությամբ ճեղքել ոստիկանության շղթան, որպեսզի հարձակում գործեն երկրի բարձրագույն օրենսդիր մարմնի վրա։ Ոստիկանությունը պաշտպանել է ՀՀ օրենսդիր ինստիտուտը, ոստիկանությունը պաշտպանել է Հայաստանի պետականությունը։ Ընդ որում, եպիսկոպոսի կոչում ունեցող մեկը, հարձակումից որոշ ժամանակ առաջ՝ դիմելով ոստիկաններին ասել է, դե տղանե՛ր, հանեք ձեր սաղավարտները, որովհետև ձեզ ոչինչ չի սպառնում։ Որոշ ժամանակ անց, այդ նույն տղաների ուղղությամբ քարանետում է սկսել այդ նույն մարդը։ Սա այն ամենն է, ինչ պետք է իմանալ, ցավոք, Հայ Առաքելական եկեղեցու 2 բարձրաստիճան պաշտոնյաների բարոյական նկարագրի մասին»,- ասաց նա։
Փաշինյանը նշեց, որ տուժել է 18 ոստիկան, 83 քաղաքացի, բոլոր վնասվածքները եղել են թեթև և միջին ծանրության, այս պահին հոսպիտալացված է 16 անձ, բոլորի վիճակը գնահատվում է բավարար։
«Երեկ այս դահլիճում նկար էին ցույց տալիս, թե քաղաքացու ձեռք է պոկվել, մինչդեռ ակնհայտ էր, որ նման բան չկա, քաղաքացին վիրահատվել է, նրա մատներից երեքը անդամահատվել են, ինչի համար ցավում եմ։ Տեղի ունեցած զանգվածային անկարգությունների, սադրիչները պետք է պատասխանատվության ենթարկվեն։ Խղճահարության վրա օրինականություն չի կարելի կառուցել, պետություն չի կարելի կառուցել։
Մենք չենք եղել ու չենք լինի թույլ իշխանություն, մենք կլինենք սիրող, կարեկցող, օգնող, հանդուրժող, բայց ոչ երբեք թույլ իշխանություն, որովհետև թույլ իշխանությունը աղետ է պետության համար»,- ասաց նա։
