Այդ քարոզչությունն արվել է ադրբեջանցիների կողմից՝ իրենց նախագահի հայտարարությունն ամրապնդելու համար, երբ ասում էր, որ հայկական կողմի նկատմամբ զրո վստահություն կա, լրագրողների հետ զրույցում հայտարարեց ԱԺ նախագահ Ալեն Սիմոնյանը։
Նա նշեց, որ այդ հայտարարությունն իր համար զարմանալի է. «Ներսում մեր ընդդիմադիր գործընկերները մեզ հակառակի մեջ են մեղադրում, ասում են՝ Ադրբեջանի նախագահն ինչ ասում է, դուք դա եք անում։ Հիմա ստացվում է, որ մեր ընդդիմությանը հերքում է Ադրբեջանի նախագահը՝ մեր մասին նման հայտարարություն անելով»։
Սիմոնյանը նշեց, որ և՛ ՊՆ-ն է հայտարարել, և՛ եվրոպական դիտորդները, որ կրակոցներ չեն եղել։
«Երբ մենք պայմանագրի վերջին երկու կետը քննարկեցինք և հետ ուղարկեցինք, մենք գիտեինք, թե հետոն ինչ է լինելու։ Վարչապետի հարցազրույցի մեջ դա կա, սակայն դա այդքան չի քննարկվել։ Այն բոլոր մտահոգությունները, որոնք առաջ են քաշվում Ադրբեջանի կողմից, դրանց մեջ դրանց լուծումները կան՝ ոչ թե մի տեղում, այլ մի քանի։ Եթե դա էլ բավարար չլինի, մենք պատրաստ ենք քննարկել, հասկանալ։ Վերջիվերջո կարող ենք երկու երկրների Սահմանադրություններն ուղարկել փորձաքննության՝ պարզելու, թե այդ պնդումներն իրականության հետ աղերս ունե՞ն, թե՞ ոչ։ Քանի որ միշտ կարելի է ասել, որ ինձ քո էս ինչ բանը դուր չի գալիս։ Բայց տրամաբանության մեջ պետք է լինի, այլ ոչ թե ներքին լսարանի մտահոգությունների»։
Սիմոնյանն ավելացրեց, որ պայմանագրում բոլոր կետերը երկկողմանի են.«Եթե մեկն ասում է, որ ինչ-որ բան վտանգավոր է, դա հավասարապես վտանգավոր է նաև Ադրբեջանի համար»։
Թե ինչու պայմանագիրը չի հանրայանացվում՝ ԱԺ նախագահը պարզաբանեց.«Դրա հիմնական կետերն արդեն հասանելի են, գիտեն։ Երբ հրապարակելու ժամանակը և տրամաբանությունը կհասկանանք, այդ ժամանակ կանենք։ Մենք այս վերջին տարիների ընթացքում կարողացել ենք այս իրավիճակում օրակարգ ձևավորող ու համահունչ կողմ դանալ։ Դա շատ դժվար էր պատերազմից հետո, բայց դրան հասել ենք»։