ԱՄՆ Սենատը հաստատել է ավելի վաղ Ներկայացուցիչների պալատի ընդունած բանաձևը, որը նախատեսում է դադարեցնել Իրանի դեմ ռազմական գործողությունները, հաղորդում է Reuters-ը։
Բանաձևին կողմ է քվեարկել 50, դեմ՝ 48 սենատոր։ Reuters-ի փոխանցմամբ՝ քվեարկությունը ցույց է տվել, որ Հանրապետական կուսակցությունում աճում է մտահոգությունը փետրվարի վերջից շարունակվող ԱՄՆ-ի և Իսրայելի՝ Իրանի դեմ պատերազմում Վաշինգտոնի ներգրավվածության շուրջ։
Reuters-ը նշում է, որ Թրամփը չի կարող վետո դնել դրա վրա։
ԱՄՆ հանրապետական սենատորներ Ռենդ Փոլը, Սյուզան Քոլինզը, Լիզա Մըրկովսկին և Բիլ Քեսիդին կողմ են քվեարկել բանաձևին։ Միևնույն ժամանակ, դեմոկրատ սենատոր Ջոն Ֆեթերմանը դեմ է քվեարկել փաստաթղթի ընդունմանը։
CNN-ի հաղորդմամբ՝ Սենատի որոշ դեմոկրատներ, այդ թվում՝ Թիմ Քեյնը, կարծում են, որ ռազմական լիազորությունների մասին բանաձևի ընդունումն անհրաժեշտ է նույնիսկ այն բանից հետո, երբ ԱՄՆ-ն և Իրանը ստորագրել են փոխըմբռնման հուշագիր և սկսել բանակցություններ Թեհրանի հետ վերջնական խաղաղության համաձայնագրի շուրջ։
Փաստաթուղթը կոչ է անում նախագահ Դոնալդ Թրամփին ԱՄՆ զինված ուժերը դուրս բերել Իրանի դեմ կամ Իրանի տարածքում ընթացող ռազմական գործողություններից։ Սակայն բանաձևը հիմնականում խորհրդանշական բնույթ ունի և պարտադիր իրավական ուժ չունի։