Արաքսի համայնքապետարանը 3 պայմանագիր է կնքել, որոնց համար ծախսվել է 902 հազար 130 դրամ։ «Փաստինֆո»-ի հաղորդմամբ՝ դրանք կնքվել են առանց մրցույթի՝ մեկ անձից գնման ընթացակարգով։
«Փաստինֆո»-ն տեղեկանում է, որ պայմանագրերը կնքվել են ի դեմս համայնքի ղեկավարի ժամանակավոր պաշտոնակատար Վահրամ Հարությունյանի, քանի որ համայնքի «ՔՊ»-ական ղեկավար Ղազար Ղազարյանը պատրաստվում է առաջիկա ՏԻՄ ընտրություններին։
Դրանք կնքվել են Արման Կարապետյան ԱՁ-ի, «Հրշեջ ընկերություն» և «Գրիգորշին» ՍՊ ընկերությունների հետ։
ՀՀ Արմավիրի մարզի Արաքս համայնքի Ջրաբի գյուղում կազմակերպվել է միջոցառում, որը նվիրված է եղել գյուղի հիսունամյակին։ Ըստ պայմանագրի՝ ելույթ են ունեցել 4 երգիչ և եղել է 1 հաղորդավար։ Թե ովքեր են երգիչները, պայմանագրում նշված չէ, սակայն նշված գումարից ենթադրելի է, որ հայտնի երգիչներ չեն եղել միջոցառմանը։
Համայնքի Խորոնք գյուղում էլ աշխատանքներ են իրականացվել։ Մասնավորապես՝ գյուղի Խորենացի փողոցի ճանապարհի մի հատվածի ասֆալտապատման աշխատանքներ են իրականացվել։
Առանց մրցույթի են ձեռք բերվել նաև հրշեջ անվտանգության մասնագիտացված ծառայություններ։
Ի դեպ, սա այն համայնքներից է, որը շատ հաճախ է պայմանագրերն առանց մրցույթի կնքում։ Առանց մրցույթի կնքված պայմանագրերով համայնքը մեծամասամբ ձեռք է բերում նախագծանախահաշվային փաստաթղթերի փորձաքննության, հեղինակային հսկողության և տարբեր միջոցառումների հետ կապված ծառայություններ։
