Այսօր՝ ժամը 15:00-ին, լրատվամիջոցների ներկայացուցիչներին հրավիրում են Արցախի Հանրապետության մշտական ներկայացուցչություն՝ Արցախի նախագահի հայցի հետ կապված դատարանի այսօրվա դիրքորոշումը պարզաբանելու, ինչպես նաև Արցախի մշտական ներկայացուցչության շենքի հետ կապված իրադարձությունները լուսաբանելու նպատակով:
Ավելի վաղ փաստաբան Ռոման Երիցյանը հայտնել էր, որ Երևան քաղաքի Նաիրի Զարյան 17/2 հասցեում գտնվող գույքից (ՀՀ-ում Արցախի Հանրապետության մշտական ներկայացուցչության շենք) Արցախի Հանրապետությանը սեփականազրկելու վերաբերյալ ՀՀ դատախազության հայցի հիման վրա քննվող գործով ՀՀ վարչական դատարանի նախագահ Կարեն Զարիկյանը կտրականապես հրաժարվում է Արցախի Հանրապետությանը կամ ԱՀ կառավարությանը ներգրավել երրորդ անձ՝ փաստացի պատճառաբանելով, որ նրա համար Արցախի Հանրապետություն, ԼՂՀ կառավարություն գոյություն չունեն։
«Սա այն դեպքում, երբ թիվ 2239396 վկայականով ՀՀ կադաստրի կոմիտեում գրանցված է ԼՂՀ կառավարության սեփականության իրավունքը Երևան քաղաքի Նաիրի Զարյան 17/2 հասցեում գտնվող գույքի նկատմամբ։
Ամփոփ ասած՝ քննվում է սեփականազրկման հարց՝ առանց գրանցված իրավատիրոջը գործով մասնակից դարձնելու։
Գործն ըստ էության լուծող դատական ակտը կհրապարակվի 2026 թվականի մայիսի 22-ին»,-նշել է նա։
