Եվրոպական հանձնաժողովի նախագահ Ֆոն դեր Լայենի հետ համատեղ ասուլիսի ժամանակ վարչապետ Նիկոլ Փաշինյանը հայտարարել է, որ ինքը բացառում է 2013 թվականի իրավիճակի կրկնությունը, երբ Հայաստանը մեկ գիշերում հրաժարվեց ԵՄ-ի հետ ասոցացման գործընթացից և միացավ ԵԱՏՄ-ին։
Վարչապետը նշել է, որ Հայաստանը երբեք խնդիր չի դրել, չունի և չի դնի Հայաստանի և Ռուսաստանի հարաբերությունների միջև ճգնաժամ ստեղծելու նպատակ։ Նրա խոսքով՝ Հայաստանը գործում է սեփական երկրի շահերի շրջանակներում և, բնականաբար, չի արհամարհում որևէ միջազգային գործընկերոջ շահերը, սակայն չի կարող որևէ այլ գործընկերոջ շահերը վեր դասել ՀՀ շահերից։
«Մենք կարող ենք վերաուղղորդել այն արտադրանքները, որոնք այժմ մեծապես ուղղված են ռուսական շուկա, և դրանք ուղարկել ԵՄ միասնական շուկա՝ 450 միլիոն սպառողների։ Այս միջոցը կբացի Եվրոպայի դռները Հայաստանի համարյա 99% թարմ գյուղմթերքի համար, նաև 90% ձեր խմիչքների և ոգելից խմիչքների արտահանման համար ԵՄ միասնական շուկա»,- հայտարարել է ֆոն դեր Լայենը։
Եվրոպական հանձնաժողովի նախագահը նաև նշել է, որ շուտով Հայաստանին կտրամադրվի լրացուցիչ 18 միլիոն եվրո՝ առևտրի ամրապնդման նպատակով, որը հանդիսանում է ավելի վաղ քննարկված 52 միլիոն եվրո օժանդակության փաթեթի վերջին մասը։
Նա հավելել է, որ առաջարկվում է նաև այսպես կոչված ինքնավար առևտրային միջոցների ներդրում, որը կազատականացնի դեպի ԵՄ արտահանման մոտ 80%-ը՝ փաստացի հնարավորություն տալով, որ Հայաստանի առևտրի մեծ մասը ԵՄ-ի հետ իրականացվի առանց մաքսատուրքերի։