Խաղաղությունը երբեք բարեկամ ժողովուրդների միջև չի հաստատվում, խաղաղությունը հաստատվում է այն երկրների, այն ժողովուրդների միջև, որոնք նախորդիվ ունեցել են արյունահեղություն, պատերազմ, հակամարտություն և այլն: Եվ ահա մենք ճանապարհի սկզբին ենք: Այս մասին Ազգային ժողովում ասել է Արտաքին գործերի նախարար Արարատ Միրոզյանը:
«Նույնիսկ առաջ անցնելով ասեմ, որ եթե առաջիկայում մենք ստորագրենք խաղաղության պայմանագիրը, միևնույն է, չենք կարող ասել, որ վերջացավ ամեն ինչ, խաղաղությունն ամբողջական հաստատված է», — նշել է նա:
Միրզոյանն ասել է, որ նկատի ունեն այն, որ այս պահին, առայժմ, կողմերն իրար վրա չեն կրակում, էսկալացիայի ռիսկը, ըստ ԱԳՆ նախարարի, մինիմալ է՝ զրոյի է ձգտում, թեժ հակամարտության ռիսկը մինիմալ է և այլն: Նա զուգահեռ նշել է, որ, այնուամենայնիվ բազմաթիվ խնդիրներ մնում են չլուծված, դրանցից մեկը Ադրբեջանում գտնվող գերիների հարցն է:
«Ցավոք, չունենք հարցի ամբողջական, վերջնական լուծում, թեև նախորդիվ ունեինք նույն ադրբեջանական կողմի հանրահռչակված պարտավորությունը՝ բոլորին ազատ արձակել: Եթե երկու երկիր անկեղծորեն ասում են խաղաղություն ենք հաստատում, երևի արժի առաջինը հումանիտար հարցերը կարգավորել, որովհետև դրանք զգայուն հարցեր են, մարդկանց համար ցավոտ հարցեր են» — ընդգծել է Արարատ Միրզոյանը:
