Եվրոպական խորհրդարանը անվտանգության նկատառումներից ելնելով անջատել է արհեստական բանականության (ԱԲ) գործիքները խորհրդարանի անդամներին տրամադրված պլանշետների վրա, հաղորդում է Euractiv-ը՝ հղում անելով գործակալության էլեկտրոնային նամակին։
Հրապարակման համաձայն՝ արգելափակումը ազդել է «ներկառուցված ԱԲ գործառույթների»՝ տեքստ գրելու գործիքների և վիրտուալ օգնականների վրա։ Էլեկտրոնային նամակում նշվում է, որ կիբերանվտանգության և տվյալների պաշտպանության մասնագետները հետաքննություն են անցկացրել և պարզել, որ «այդ գործառույթներից մի քանիսը օգտագործում են ամպային ծառայություններ՝ առաջադրանքներ կատարելու համար» տեղականների փոխարեն, ինչը կարող է հանգեցնել տվյալների արտահոսքի։
«Մինչև իրավիճակի լիարժեք պարզաբանումը, ավելի անվտանգ է համարվում նման գործառույթները անջատված թողնելը», — ասվում է հայտարարության մեջ։
Խորհրդարանի տեղեկատվության գլխավոր տնօրենը պատգամավորներին կոչ է արել անջատել արհեստական ինտելեկտի անհարկի գործառույթներն իրենց սարքերում, ինչպես նաեւ սահմանափակել նեյրոցանցի հասանելիությունը աշխատանքային նամակներին եւ փաստաթղթերին:
2024 թվականի մարտին Եվրախորհրդարանը հավանություն է տվել արհեստական ինտելեկտի կիրառումը կարգավորող օրենքին։ Նոր կանոնները սահմանափակում են AI-ի որոշակի ծրագրերի գործունեությունը, որոնք սպառնալիք են ներկայացնում քաղաքացիների համար: Օրենքը նաև արգելում է իրավապահ մարմինների կողմից կենսաչափական նույնականացման համակարգերի օգտագործումը:
