Մարտի 18-ին ՀՀ ԱԳ նախարարի տեղակալ Վահան Կոստանյանը «Ռաիսինա երկխոսություն 2025» (“Raisina Dialogue 2025”) համաժողովի շրջանակներում որպես բանախոս մասնակցել է «Իրանի գործոնը. ճգնաժամ, համադրում, մրցակցություն» պանելային քննարկմանը: Հայտնում են ՀՀ ԱԳՆ-ից:
Բանախոսները քննարկել են Մերձավոր Արևելքում տեղի ունեցող արագ փոխակերպումներից առաջ եկող մարտահրավերները, տարածաշրջանում պաշտոնական Թեհրանի ներգրավվածությանն ու դիրքին առնչվող հարցերը, այդ համատեքստում մտքեր են փոխանակել Իրանի և միջազգային այլ դերակատարների դերի շուրջ:
Իր խոսքում նախարարի տեղակալը նշել է, որ Մերձավոր Արևելքում տեղի ունեցող իրադարձությունները ազդեցություն ունեն ոչ միայն այդ տարածաշրջանի վրա և շեշտել, որ Հայաստանը Մեծ Մերձավոր Արևելքի մաս է, և մեր երկրում ևս անմիջապես զգացվում են տեղի ունեցող իրադարձությունները։ Միաժամանակ Վահան Կոստանյանը ներկաների ուշադրություն է հրավիրել նաև այդ երկրներում հայկական ժառանգության և ավանդական հայկական համայնքների առկայության փաստին:
Պանելային քննարկման ընթացքում ներկայացվել է նաև «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագրի տեսքտի վերջնական փոխհամաձայնեցումը, և այս փաստի ողջունումը միջազգային բազմաթիվ գործընկերների կողմից:
Նախարարի տեղակալը նաև ընդգծել է միջազգային տարբեր տրանսպորտային երթուղիների կարևորությունը գլոբալ անվտանգության և կայունության հաստատման համատեքստում՝ առանձնանշելով տարբեր նախագծերում Հարավային Կովկասի հատուկ կարևորությունը և Հայաստանի Հանապետության կառավարության ջանքերն՝ ուղղված տարածաշրջանային բոլոր ենթակառուցվածքների ապաշրջափակմանը՝ համաձայն «Խաղաղության խաչմերուկ» նախագծի: