«Հրապարակ» թերթը գրում է. «Քաղաքական շրջանակներում սկսել են խոսել, որ Բագրատ սրբազանը կրկին ակտիվանում է և վերսկսելու է մեկ տարի առաջ մեկնարկած ու կիսատ մնացած փողոցային պայքարը։ Անգամ հստակ օր է նշվում՝ մայիսի 28։ Փորձեցինք Սրբազանին մերձ շրջանակից ճշտել լուրը, սակայն մեզ վստահեցրին, որ չունեն նման տեղեկություն։ Սրբազան շարժման ժամանակ ձևավորված խոսնակների խորհրդի ներկայացուցիչը մեզ փոխանցեց, որ վերջին անգամ հավաք արել են անցած տարվա կեսերին, և եթե ակտիվանալու մտադրություն լիներ, իրեն անպայման տեղյակ կպահեին։
Սրբազանի զինակից Գառնիկ Դանիելյանն էլ ակտիվանալու և փողոց դուրս գալու մասին հարցին հարցով պատասխանեց. «Իսկ մենք ե՞րբ փողոցում չենք, երեկ էլ մինչև ուշ երեկո Սրբազան պայքարի ձերբակալված երիտասարդների համար ոստիկանության շենքի առջև էինք բողոքի ակցիա անում»։
Հիշեցնենք. մեկ տարի առաջ այս օրերին ձևավորված «Տավուշը հանուն հայրենիքի», ապա՝ «Սրբազան» վերանվանված շարժումը խոստանում էր շաբաթների ընթացքում լուծել երկրում իշխանափոխության հարցը՝ իմպիչմենտի ճանապարհով «տուն ուղարկելով» Նիկոլ Փաշինյանին։ Տավուշից քայլերթով մայիսի 9-ին Երևան հասած և մի քանի ամիս հանրահավաքներ արած շարժման առաջնորդը, սակայն, չկարողացավ կատարել տված խոստումը, իսկ աշնանը խոստացավ, որ կիսատ մնացած գործը շարունակելու է 2025-ին»։
