«Հրապարակ» թերթը գրում է. «Պարզվում է՝ ՔՊ-ից հեռացված Հովիկ Աղազարյանի ավագ որդին՝ Իվան Աղազարյանը, տարիներ առաջ լքել է Դաշնակցության շարքերը և նույնպես պատրաստվում է անդամակցել հոր և Հակոբ Ասլանյանի հիմնադրած կուսակցությանը՝ ՄԱՍԿ-ին, ինչպես իր կրտսեր եղբայրը` Հովսեփ Աղազարյանը, որը ՔՊ-ից օրեր առաջ հեռանալու դիմում է գրել։
Աղազարյանը մեր լրագրողին ասել է, որ որդիներից ավագը դառնալու է կուսակցության վարչության անդամ, և շեշտել, որ ավագ որդին Դաշնակցությունից հեռացել է իր խնդրանքով․ «Երբ որ Դաշնակցությունը հեղափոխությունից հետո դուրս եկավ կոալիցիայից, մենք՝ որպես մի ընտանիք, նստեցինք և խորհրդակցեցինք, թե ինչ պետք է անել։ Ես ասացի, որ կա՛մ ես պետք է դուրս գամ ՔՊ-ից, կա՛մ ինքը` ՀՅԴ-ից, որովհետև այդպես չի կարող լինել: Երբ կոալիցիա էին, դա փոխում էր իրավիճակը, հիմա, երբ քաղաքական տարբեր բարիկադների վրա ենք, կամա թե ակամա, մեր ընտանեկան զրույցները կարող են վերաճել մի իրողության, որ դիսկոմֆորտի զգացում կարող է առաջացնել, հետևաբար՝ որոշում կայացրինք, որ տղաս պետք է դուրս գա ՀՅԴ-ից»»։
