Իրանի ԱԳՆ ներկայացուցիչ Իսմայիլ Բաղաին պատասխանել է Sputnik-ի թղթակցի հարցին, թե Հայաստանի վարչապետը հայտարարել է Թեհրանի և Երևանի միջև հարաբերությունների զարգացմանն աջակցելու և Իրանի հետ ռազմավարական գործընկերության մասին փաստաթուղթ ստորագրելու ցանկության մասին։ Այս մասին հաղորդում է ISNA գործակալությունը։
Հատկանշական է հատկապես հարցի ձևակերպումը, որը ներկայացնում ենք ստորև. «Հաշվի առնելով, որ Հայաստանը 2025 թվականին Ռազմավարական գործընկերության համաձայնագիր է ստորագրել ԱՄՆ-ի, այնուհետև Եվրոպական միության հետ և մասամբ դուրս է եկել Հավաքական անվտանգության պայմանագրի կազմակերպությունից, ինչպես նաև հաշվի առնելով Եվրամիության և ԱՄՆ-ի հետ Իրանի խնդիրները պատժամիջոցների ոլորտում, արդյո՞ք Իրանը պատրաստ է Հայաստանի հետ ստորագրել ռազմավարական գործընկերության համաձայնագիր, որը նման է Ռուսաստանի և Չինաստանի հետ իր համաձայնագրերին»:
Սրան ի պատասխան Բաղաին հայտարարել է.
«Իրանը իր հարաբերությունները կարգավորում է ազգային շահերից ելնելով, և Հայաստանի հետ հարաբերությունները բացառություն չեն այս կանոնից։ Հայաստանի հետ մեր հարաբերությունները հիմնված են փոխադարձ շահերի, խնդիրների և ընդհանրությունների ճշգրիտ ընկալման վրա, մենք շատ լավ հարաբերություններ ունենք այս երկրի հետ և վճռական ենք շարունակելու այդ հարաբերությունները տարբեր ոլորտներում»,- ընդգծել է նա։
Բաղաին շեշտել է նաև, որ Իրանը հարգում է այն փաստը, որ երկրները հարաբերություններ ունեն այլ կողմերի հետ, եթե դա չի վնասում Իրանի հարաբերություններին և շահերին:
«Մեր հարաբերություններն այլ երկրների հետ ձևավորվում են փոխադարձ շահերի և խնդիրների մանրակրկիտ վերլուծության հիման վրա, և Հայաստանի և հարևան մյուս երկրների հետ մեր հարաբերությունները կարգավորվում են այդ հիմքի վրա»,- հավելել է նա։
