Իսլամական հեղափոխության պահապանների կորպուսը (ԻՀՊԿ) ձերբակալել է Իրանի նախկին նախագահ Մահմուդ Ահմադինեժադին՝ Իսրայելի հետախուզական գործակալություն Մոսադի հետ երկարատև կապերի կասկածանքով։ Նա տնային կալանքի տակ է։
Այս մասին հուլիսի 13-ին հայտնել է The New York Times-ը՝ հղում անելով Իրանի չորս բարձրաստիճան պաշտոնյաների և ամերիկյան կառավարության աղբյուրների։
Նրանց տվյալներով՝ Ահմադինեժադը ձերբակալվել և տնային կալանքի տակ է հայտնվել Իսլամական հեղափոխության պահապանների կորպուսի (ԻՀՊԿ՝ Իրանի այաթոլլաների ռեժիմի ռազմական թևի) անդամների կողմից։
Ամերիկացի պաշտոնյաների տվյալներով՝ վերջին տարիներին Իսրայելի կառավարությունը գաղտնի վճարել է Ահմադինեժադին բնակարանի և ճանապարհորդության համար։ Մոսադը նրան համարում էր Իրանը կառավարելու համար փոխզիջումային կերպար, եթե այաթոլլաների ռեժիմը տապալվեր։
NYT-ի փոխանցմամբ՝ իսրայելական գործակալները մի քանի անգամ հանդիպել են Ահմադինեժադի հետ արտասահմանում, այդ թվում՝ Բուդապեշտ կատարած նրա այցելությունների ժամանակ։
Ավելին, 2024 թվականի սկզբին նա Բուդապեշտում գաղտնի հանդիպել է Մոսադի այն ժամանակվա ղեկավար Դեյվիդ Բարնեայի հետ։ Այդ նպատակով, իսրայելական կողմի խնդրանքով, հունգարական իշխանությունները կազմակերպել են Ահմադինեժադի մասնակցությունը կլիմայական համաժողովին, որի շրջանակներում նա հանդիպել է Բարնեայի հետ։ Կապերը շարունակվել են նաև 2025 թվականին։ Հունիսին նրան հաջողվել է առնվազն երկու անգամ խուսափել անվտանգության ծառայությունից և անհետանալ երկարատև հանդիպումների համար։ NYT-ը հաղորդում է, որ հանդիպումները գրանցվել են նաև Գվատեմալայում։
