«Ժողովուրդ» թերթը գրում է. «Ինչու միայն Էկոնոմիկայի նախարարության չարաշահումների քրեական գործով նախարար Քերոբյանը ազատվեց պաշտոնից, իսկ մյուս մեղադրյալները շարունակում են աշխատել նախարարությունում։ Ինչպես հայտնի է, ՀՀ Քննչական կոմիտեն էկոնոմիկայի արդեն նախկին նախարար Վահան Քերոբյանի և մյուսների դեմ հարուցված քրեական գործը ուղարկել է Հակակոռուպցիոն դատարան։
Հիշեցնենք, որ այս գործով, նախկին նախարարից բացի, մեղադրյալի աթոռին է նաև «Սիներջի» ընկերության ղեկավար Աշոտ Հովհաննիսյանը, որը հաղորդավարուհի Լուսինե Թովմասյանի սկեսրայրն է, ով չի ընդունում իր մեղքը:
Իսկ ընկերության աշխատակիցներից ԱԺ նախագահ Ալեն Սիմոնյանի եղբոր կինը՝ Անի Գևորգյանը, մեղադրյալի կարգավիճակ ուներ, սակայն, գործուն զղջալու հիմքով, նրա նկատմամբ քրեական վարույթը կարճվեց։
Այս գործով ուշագրավ հանգամանքն այն է, որ էկոնոմիկայի նախարարության աշխատակիցներ Աննա Ղարիբջանյանը, Սոնա Գրիգորյանը և Աշոտ Սողոմոնյանը քրեական գործով թեև մեղադրյալներ են, սակայն շարունակում են իրենց գործունեությունը էկոնոմիկայի նախարարությունում, ուստի հարց է առաջանում. քաղաքական իշխանության միակ խնդիրը Վահան Քերոբյանից ազատվե՞լն էր:
Նշենք, որ «ՀՀ էկոնոմիկայի նախարարության կարիքների համար» ծառայության ձեռքբերման մրցույթի ընթացքում կատարված առերևույթ չարաշահումների վերաբերյալ քրեական վարույթով քրեական հետապնդում է հարուցվել 8 անձի նկատմամբ»։
