«Ժողովուրդ» օրաթերթը գրում է. «Կոռուպցիայի կանխարգելման հանձնաժողովը Արարատի մարզպետ Սեդրակ Թևոնյանի ընտանիքի անդամ Ռուզան Մարգարյանի նկատմամբ Վարչական իրավախախտումների վերաբերյալ օրենսգրքի 169.28-րդ հոդվածի 5-րդ մասով նախատեսված առերևույթ իրավախախտման հատկանիշներով հարուցել է վարչական վարույթ։
Բանն այն է, որ ուսումնասիրվել է Ռուզան Մարգարյանի կողմից Հանձնաժողով ներկայացված 2023 թվականի գույքի, եկամուտների և ծախսերի հայտարարագրում հայտարարագրված տվյալների արժանահավատությունը և ամբողջականությունը, որի արդյունքում արձանագրվել է հետևյալ անհամապատասխանությունը. Ռուզան Մարգարյանը հայտարարագրի «Բ.3 Արժեթղթեր և այլ ներդրումներ» բաժնում չի հայտարարագրել իր՝ «Արփի գինու գործարան» ՍՊԸ-ի 100% բաժնետեր լինելու վերաբերյալ տվյալները։
Մարգարյանը ծանուցվել է նշված գործի քննությանը մասնակցելու նպատակով. վերջինս չի ներկայացել, սակայն ներկայացուցիչ է ունեցել, և ներկայացուցիչ Հովհաննես Ուրֆանյանի ներկայությամբ կազմվել է վարչական իրավախախտման վերաբերյալ արձանագրություն։
Վարչական իրավախախտման վերաբերյալ գործի քննության տեղի և ժամանակի մասին պատշաճ ծանուցված Մարգարյանի բացակայության պայմաններում 2025 թվականի փետրվարի 20-ին տեղի է ունեցել վարչական իրավախախտման վերաբերյալ գործի քննություն։
Արդյունքում, Սեդրակ Թևոնյանի ընտանիքի անդամ Ռուզան Մարգարյանի նկատմամբ կիրառվել է վարչական տույժ՝ սահմանված նվազագույն աշխատավարձի երկուհարյուրապատիկի՝ 200 հազար դրամի չափով»։
