Փարիզի Լուվրի թանգարանը երկուշաբթի օրը կրկին փակվել է այցելուների համար՝ աշխատակիցների գործադուլի պատճառով։ Թանգարանի տարածած հաղորդագրության համաձայն՝ գործադուլը սկսվել է դեկտեմբերի կեսերին՝ պայմանավորված աշխատանքային պայմանների վատթարացմամբ և ռեսուրսների պակասով։
Աշխատողների բողոքի ցույցերը մեկնարկել են դեկտեմբերի 15-ին։ Այդ ժամանակից ի վեր Լուվրը չորս անգամ ամբողջությամբ փակվել է այցելուների համար, իսկ մի քանի դեպքերում գործել է մասնակի ռեժիմով։ Գործադուլը տեղի է ունենում մի շարք խնդիրների ֆոնին, որոնց թանգարանը բախվել է անցած տարվա ընթացքում։
2025 թվականի նոյեմբերին Լուվրում արձանագրվել են մի շարք վթարներ՝ ներքին կառուցվածքների և ջրատար խողովակների վատ վիճակի պատճառով։ Ամսվա կեսին թանգարանը հայտարարել էր իր պատկերասրահներից մեկի փակման մասին՝ առաստաղների փխրունության պատճառով։ Նոյեմբերի վերջին էլ Լուվրի գրադարանը ողողվել էր կեղտոտ ջրով՝ հին խողովակների արտահոսքի հետևանքով, ինչի արդյունքում վնասվել էր 300-ից 400 փաստաթուղթ։
Բացի այդ, 2025 թվականի աշնանը Լուվրը ենթարկվել էր աղմկոտ կողոպուտի։ Հոկտեմբերի 19-ին անհայտ անձինք ներխուժել էին թանգարան և գողացել ինը թանկարժեք զարդ՝ այդ թվում թագեր, ականջօղեր, վզնոցներ և կրծքազարդեր, որոնք պատկանել էին Ֆրանսիայի թագուհիներին և կայսրուհիներին։ Գողացված զարդերից մեկը՝ կայսրուհի Եվգենի դե Մոնտիժոյի վնասված թագը, վերականգնվել և վերադարձվել է թանգարան։ Կողոպուտի հետևանքով պատճառված վնասը գնահատվում է շուրջ 88 միլիոն եվրո։ Դեպքի առթիվ ձերբակալվել է մի քանի անձ, որոնցից հինգին մեղադրանք է առաջադրվել։ Գողացված զարդերի մեծ մասը դեռևս չի հայտնաբերվել։
1793 թվականին հիմնադրված և նախկինում թագավորական նստավայր հանդիսացած Լուվրը ներկայումս մնում է աշխարհի ամենաշատ այցելվող թանգարանը։