Ֆրանսիայի նախագահ Էմանուել Մակրոնը խոստացել է պատասխանատվության ենթարկել և պատժել նրանց, ովքեր շաբաթ օրը երկրում տեղի ունեցած կենսապահովման գնի բարձրացման դեմ բողոքի ցույցերի ժամանակ անկարգություններ և ավերածություններ են առաջացրել։
«Մեր հանրապետությունում բռնության տեղ չկա։ Նրանք, ովքեր ամեն ինչ ավերել են, հարձակվել են պրեֆեկտուրաների և խանութների վրա, թալանել՝ մինչև քաղաքապետարաններ, պատասխանատվության կենթարկվեն և կպատժվեն», — գրել է Մակրոնը սոցիալական ցանցերում։
Շաբաթ օրը Ֆրանսիայի ողջ տարածքում լայնածավալ բողոքի ակցիաներ են տեղի ունեցել կյանքի գնի թանկացման և գների բարձրացման դեմ: Դրանք ուղեկցվել են ցուցարարների և ոստիկանության կատաղի բախումներով, անկարգություններով, ջարդերով և վանդալիզմով։ Արմատական երիտասարդները ջարդել են խանութներ, հրդեհել հասարակական տրանսպորտի կանգառներ և մեքենաներ։ Ոստիկանությունը օգտագործել է արցունքաբեր գազ, շոկային նռնակներ և ջրցան մեքենաներ՝ անկարգությունների մասնակիցներին ցրելու համար։
Անկարգությունների ժամանակ արմատականները ներխուժել են Լիմոժի, Մարսելի և Լիլի քաղաքապետարանների շենքեր։ Լիմոժում քաղաքապետարանի առաջին հարկում Նրանք հրդեհ են սարքել, կրակը տարածվել է շենքի տանիքին։ Լիոնում կողոպտել ու հրդեհել են զբոսաշրջային գրասենյակը:
Ֆրանսիայի ներքին գործերի նախարարի նախնական տվյալներով՝ երկրում տեղի ունեցած անկարգությունների ընթացքում ձերբակալվել է մոտ 400 մարդ։ Ֆրանսիայում տեղի ունեցած ցույցերին մասնակցել է ընդհանուր առմամբ 550,000 մարդ, որոնցից 110,000-ը՝ Փարիզում։
