Հակակոռուպցիոն կոմիտեն դատարան է ներկայացրել միջնորդություն՝ բլոգեր Միկա Բադալյանի նկատմամբ որպես խափանման միջոց կիրառել կալանքը, որը բավարարվել է։
Ավելի վաղ կոմիտեն հայտնել էր նրա նկատմամբ հանրային քրեական հետապնդում հարուցելու մասին։
ՀԿԿ-ի հաղորդմամբ՝ Ռուսաստանում բնակվող բլոգեր Մ. Բ.-ն, ՀՀ Ազգային ժողովի հերթական ընտրություններին մասնակցելու նպատակով, Ռուսաստանի Դաշնությունում գտնվող Հայաստանի Հանրապետության հարյուրավոր քաղաքացիներին խոստացել է տարբեր ծառայություններ և առավելություններ՝ ընտրակաշառք տրամադրելու նպատակով։ Դեպքի առթիվ նախաձեռնվել է քրեական վարույթ։
Բադալյանի նկատմամբ կալանավորելու որոշումը կայացվել է դատարանի կողմից՝ բավարարելով ներկայացված միջնորդությունը։
Բլոգերն իր հերթին Telegram-ի իր ալիքում հայտնել է, որ գտնվում է Հայաստանից դուրս։
Հիշեցնենք նաև, որ նա ապրիլի 22-ին բերման էր ենթարկվել Ազատության հրապարակից և ձերբակալվել։ Քննչական կոմիտեի տվյալներով՝ նա ապրիլի 11-ին իր Telegram-յան էջում, չունենալով համապատասխան տվյալներ, տարածել է սուտ հաղորդում՝ հնարավոր ահաբեկչությունների վերաբերյալ, որոնք կարող էին ստեղծել արտակարգ իրավիճակ։
