ԱՄՆ պետքարտուղար Մարկո Ռուբիոն ժամանել է Պանամա: Դա այդ պաշտոնում նրա առաջին արտասահմանյան այցն է: Կենտրոնական Ամերիկայի այդ երկրի նախագահ Խոսե Ռաուլ Մուլինոյի հետ հանդիպման ժամանակ նա ասել է, որ անհապաղ փոփոխություններ են անհրաժեշտ Պանամայի ջրանցքի՝ Խաղաղ և Ատլանտյան օվկիանոսները կապող առանցքային նավարկելի զարկերակի գործունեության հարցում:
Ռուբիոն նշել է, որ ԱՄՆ նախագահ Դոնալդ Թրամփը եկել է այն եզրակացության, որ Չինաստանի ազդեցությունը սպառնում է Պանամայի ջրանցքի աշխատանքին: Իր ուղևորությունից առաջ ԱՄՆ պետքարտուղարը նախազգուշացրել էր, որ Չինաստանը, որը վերահսկում է նավահանգստային օպերատոր ընկերությանը, հակամարտության դեպքում կարող է արգելափակել ջրանցքի մուտքը:
Նախագահ Խոսե Ռաուլ Մուլինոն Մարկո Ռուբիոյի հետ բանակցություններից հետո ասել է, որ Պանամայի ինքնիշխանությունը ջրանցքի նկատմամբ չպետք է կասկածի տակ դրվի: Միաժամանակ նա հայտարարել է ԱՄՆ-ի հետ համագործակցելու պատրաստակամության մասին, մասնավորապես, անօրինական ներգաղթյալների վերադարձի հարցում՝ ոչ միայն Պանամայից, այլև հարևան երկրներից։
