Ռուսաստանի և Հայաստանի հարաբերությունները շարունակելու են զարգանալ։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը, հաղորդում է ՏԱՍՍ-ը։
«Մենք շարունակելու ենք զարգացնել մեր հարաբերությունները Հայաստանի հետ, ունենք բազմաթիվ ընդհանուր ծրագրեր։ Ռուսաստանը Հայաստանի խոշոր ներդրողներից է, հետևաբար համագործակցության ոլորտները շատ են, և հարաբերությունները կշարունակեն զարգանալ»,– նշել է Պեսկովը։
Նա նաև ընդգծել է, որ ներկայում Երևանը գտնվում է իր զարգացման ուղու ընտրության գործընթացում։
«Մենք տեսնում ենք, որ Հայաստանը և Հայաստանի ղեկավարությունը գտնվում են որոշակի խաչմերուկում՝ քննարկելով զարգացման հետագա ուղին։ Դա մեզ համար կարևոր է, քանի որ դարեր շարունակ Ռուսաստանն ու Հայաստանը եղել են հարևան և եղբայրական ժողովուրդներ»,– ասել է Կրեմլի ներկայացուցիչը։
