Սաակաշվիլին բանտային անմարդկային պայմանների մասին է հայտարարել

Վրաստանի նախկին նախագահ Միխեիլ Սաակաշվիլին հայտարարել է, որ իր բանտային պայմանները անմարդկային են և, միջազգային չափանիշներով, հավասարազոր են խոշտանգումների: Նա այս մասին հայտարարություն է հրապարակել իր Ֆեյսբուքյան էջում։

Սաակաշվիլիի խոսքով՝ ինքը պահվում է փոքր, մութ, չօդափոխվող խցում՝ ոչ սանիտարական պայմաններով: Նա նաև պնդում է, որ այլ քաղբանտարկյալներ պահվում են նմանատիպ պայմաններում։

«Հոկտեմբերի 1-ին կլրանա իմ բանտարկության հինգ տարին՝ նույնքան ժամանակ, որքան Սերվանտեսն անցկացրել է գերության մեջ: Միջազգային չափանիշներով նման երկարատև մենախցում պահելը հավասարազոր է խոշտանգումների և անմարդկային վերաբերմունքի»,-գրել է Սաակաշվիլին։

Նախկին նախագահը նաև նշել է, որ բանտը գտնվում է ցեմենտի գործարանի կողքին, որը, նրա պնդմամբ, պատկանում է իշխող «Վրացական երազանք» կուսակցության հիմնադիր Բիձինա Իվանիշվիլիին, և որ գործարանի փոշին, ենթադրաբար, դժվարացնում է շնչառությունը։

Ավելին, Սաակաշվիլին պնդում է, որ բանտարկության ողջ ընթացքում իրեն արգելվել է հեռախոսազանգեր կատարել, բացառությամբ շաբաթը մեկ անգամ իր դստեր՝ Ալիսայի հետ մի քանի րոպեանոց զրույցի: Նրա խոսքով ՝ իրեն նաև մերժում են Ուկրաինայի հյուպատոսի հետ հանդիպումները, Ուկրաինական տպագիր և վիդեո նյութերի հասանելիությունը, իսկ փաստաբաններին արգելում են բերել իր երեխաների և թոռան լուսանկարները: Նա նաև հայտարարել է, որ միջազգային, կառավարական և խորհրդարանական պատվիրակությունների այցերը բազմիցս մերժվել են:

Վերջապես, Սաակաշվիլին պնդել է, որ իրեն վերաբերվում են «ինչպես ռազմագերու»՝ մեղադրելով վրացական իշխանություններին իր կամքը կոտրելու փորձի մեջ։

Վրացական իշխանությունները նախկինում բազմիցս հերքել են նախկին նախագահի մեղադրանքները վատ վերաբերմունքի մասին և հայտարարել, որ նրա կալանքի պայմանները համապատասխանում են օրենքի պահանջներին։

Սաակաշվիլիին Վրաստանում մեղադրանք է առաջադրվել հինգ քրեական գործով, այդ թվում՝ վրացի պատգամավոր Վալերի Գելաշվիլիի ծեծի, բանկի աշխատակից Սանդրո Գիրգվլիանիի սպանության համար դատապարտվածների ներում շնորհելու, պետական ​​միջոցների յուրացման, 2007 թվականին բողոքի ցույցը ցրելու և սահմանի անօրինական հատման համար։ Չորս դատավճիռների համաձայն՝ Սաակաշվիլին պետք է կրի իր պատիժը մինչև 2034 թվականը։