Հյուսիսային Իռլանդիայի, Ուելսի և Շոտլանդիայի առաջին նախարարներ Միշել Օ’Նիլը, Ռուն ապ Յորվերտը և Ջոն Սուինին ստորագրել են փոխհասկացվածության հուշագիր, որում ամրագրված է տարածաշրջանների՝ ինքնորոշման իրավունքը։ Փաստաթուղթը ստորագրվել է Քարդիֆում կայացած հանդիպման ժամանակ, հայտնում է ՏԱՍՍ-ը:
Ինչպես հետևում է տեքստից, որի հատվածները մեջբերում է Sky News հեռուստաալիքը, առաջնորդները կոչ են արել Մեծ Բրիտանիայի կառավարությանը պատրաստվել, պլանավորել և ապահովել սահմանադրական փոփոխություններ յուրաքանչյուր իրավասության մեջ, որպեսզի տարածաշրջանները հնարավորություն ունենան կազմակերպելու Միացյալ Թագավորությունից դուրս գալու հանրաքվեներ։ Հուշագրում ասվում է, որ Հյուսիսային Իռլանդիան, Ուելսը և Շոտլանդիան իրենց ապագան տեսնում են Եվրամիության կազմում։ Անդրադառնալով նաև տնտեսական հարցերին՝ նշվում է, որ առաջին նախարարները մտադրված են ուժեղացնել համագործակցությունը միմյանց միջև։
Քարդիֆի գագաթնաժողովն անցկացվել է այն բանից երկու օր անց, երբ ԱՄՆ նախագահ Դոնալդ Թրամփը Դուբլինում Իռլանդիայի վարչապետ Միխոլ Մարտինի հետ հանդիպմանը հայտարարել էր, թե կցանկանար տեսնել Հանրապետության միավորումը Հյուսիսային Իռլանդիայի հետ։ Մեծ Բրիտանիայի վարչապետ Էնդի Բըրնեմը օգոստոսի 27-ին Բելֆաստ կատարած այցի ժամանակ բացառել էր Հյուսիսային Իռլանդիան Իռլանդիայի Հանրապետության հետ միավորելու հանրաքվեի անցկացումը։
RTE հեռուստաալիքի տեղեկություններով՝ Օ’Նիլը, ապ Յորվերտը և Սուինին հանդիպմանը մասնակցել են ոչ թե որպես Հյուսիսային Իռլանդիայի, Ուելսի և Շոտլանդիայի առաջին նախարարներ, այլ համապատասխանաբար որպես «Շինն Ֆեյն» ազգային-հանրապետական կուսակցության, ձախ ազգայնական «Ուելսի կուսակցության» և Շոտլանդական ազգային կուսակցության ներկայացուցիչներ։
Ավելի վաղ Օլսթերի առաջին փոխնախարար Էմմա Լիտլ-Պենգելին հայտարարել էր, որ Օ’Նիլը լիազորություններ չունի որևէ փաստաթուղթ ստորագրելու որպես տարածաշրջանի ղեկավար՝ առանց իր համաձայնության։ Հյուսիսային Իռլանդիայում իշխանության համակարգը՝ համաձայն Բելֆաստի համաձայնագրի, կառուցված է այնպես, որ կարևոր որոշումների ընդունման համար անհրաժեշտ է ինչպես առաջին նախարարի, այնպես էլ նրա տեղակալի աջակցությունը, ովքեր ներկայացնում են տարբեր ազգային-կրոնական համայնքներ՝ կաթոլիկ-հանրապետականներին և բողոքական-միութենականներին։
