Թուրքիայի Ազգային մեծ ժողովի Արտաքին հարաբերությունների հանձնաժողովի նախագահ Ֆուաթ Օքթայը Բաքվում հայտարարել է, որ թուրք-հայկական հարաբերությունների կարգավորումը զուգահեռ է ընթանում հայ-ադրբեջանական գործընթացի հետ՝ հույս հայտնելով, որ տարածաշրջանի օրակարգը կձևավորվի խաղաղության և զարգացման շուրջ, հայտնում է APA-ն:
Նրա խոսքով՝ այս գործընթացներն իրականացվում են զուգահեռաբար. «Մենք հույս ունենք, որ այս ամենը շատ արագ կզարգանա, և տարածաշրջանի օրակարգն այլևս կորոշվի ոչ թե հակամարտություններով, այլ խաղաղությամբ, բարօրությամբ և զարգացմամբ։ Այսուհետ մենք ավելի շատ կկենտրոնանանք ապագայի վրա»։
Խորհրդարանական հանձնաժողովի նախագահի պնդմամբ՝ Ղազախստանի և Ռուսաստանի միջոցով ներկրվող ցորենի փոխադրումը, ինչպես նաև Հայաստան-Ադրբեջան հարաբերությունների շրջանակում առևտրային կապերի մեկնարկը արտահայտում են ադրբեջանական կողմի ինքնավստահությունը։
Նա նշել է, որ Ադրբեջանն իրականում սկսել է փուլ առ փուլ իրականացնել պայմանավորվածությունը նույնիսկ նախքան խաղաղության պայմանագրի պաշտոնական ստորագրումը և դրա իրավական պարտադիր ուժ ստանալը.
«Սա շատ կարևոր ցուցանիշ է և վկայում է Ադրբեջանի ինքնավստահության մասին»,- հայտարարել է Օքթայը:
