Գերմանիայի կանցլեր Ֆրիդրիխ Մերցը հայտարարել է, որ Ուկրաինան ստիպված կլինի տարածքային զիջումներ անել՝ խաղաղության համաձայնագիր կնքելու և Եվրամիությանը միանալու համար։
«Ինչ-որ պահի Ուկրաինան կստորագրի հրադադարի մասին համաձայնագիր, իսկ ինչ-որ պահի, հուսանք, նաև՝ խաղաղության պայմանագիր Ռուսաստանի հետ։ Այդ դեպքում կարող է պատահել, որ Ուկրաինայի տարածքի մի մասը դադարի լինել ուկրաինական», — Մերցի խոսքերն է մեջբերել Reuters-ը Մարսբերգի (Հյուսիսային Հռենոս-Վեստֆալիա) մարզադահլիճում աշակերտների առջև ունեցած ելույթում։
Մերցը նաև տարածքային զիջումները կապել է Ուկրաինայի՝ Եվրամիությանը միանալու հեռանկարների հետ։ Նա նշել է, որ Կիևը կարող է հանրաքվե անցկացնել տարածքային զիջումներ ներառող համաձայնագրի վերաբերյալ, որից հետո Վլադիմիր Զելենսկին, իբր, կարող է Ուկրաինայի ժողովրդին ասել. «Ես ձեզ համար բացել եմ Եվրոպա տանող ճանապարհը»։
Ռուսաստանը բազմիցս հայտարարել է ուկրաինական ճգնաժամի բանակցային լուծում փնտրելու իր պատրաստակամության մասին՝ հիմնվելով Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի միջև Ալյասկայի գագաթնաժողովում ձեռք բերված համաձայնությունների վրա, ներառյալ հակամարտության արմատական պատճառների, մասնավորապես՝ Ռուսաստանի ազգային անվտանգությանը սպառնացող վտանգների լուծմամբ։ Թրամփը նախկինում իր զարմանքն է հայտնել Կիևի ռեժիմի՝ ուկրաինական կարգավորման հարցում համաձայնության չհասնելու վերաբերյալ։
Ռուսաստանի արտաքին գործերի նախարար Սերգեյ Լավրովը հայտարարել է, որ Եվրոպան Զելենսկիին հրահրում է շարունակել Ռուսաստանի դեմ պայքարը մինչև վերջին ուկրաինացին, սակայն չունի դրա համար անհրաժեշտ միջոցները և ստիպված է փորձել թալանել Ռուսաստանը։
