«Ուժեղ Հայաստան» կուսակցությունը Ազգային փոքրամասնությունների օրվա առթիվ հայտարարություն է տարածել․
‹‹Հայաստանում ապրող ազգային փոքրամասնությունների սիրելի՛ ներկայացուցիչներ,
«Ուժեղ Հայաստան» կուսակցությունը ջերմորեն շնորհավորում է ձեզ Ազգային փոքրամասնությունների օրվա առթիվ։
Դարեր շարունակ Հայաստանի Հանրապետությունում հայ ժողովրդի կողքին ապրող և արարող ազգային փոքրամասնությունների համայնքները մեր երկրի հասարակական կյանքի անբաժանելի մասն են։ Նրանց մշակույթը, լեզուն, ավանդույթներն ու ինքնատիպությունը մեր երկրի բազմազանության և հարստության կարևոր բաղադրիչներն են։
Մենք համոզված ենք, որ յուրաքանչյուր քաղաքացու ինքնության ազատ արտահայտման և պահպանման հնարավորությունը, ինչպես նաև ազգային ու մշակութային ավանդույթների նկատմամբ հարգանքը, ուժեղ և համերաշխ պետության կարևոր հիմքերից են։
Մենք բարձր ենք գնահատում ազգային փոքրամասնությունների ներկայացուցիչների մասնակցությունն ու ներդրումը Հայաստանի անվտանգության, ինքնիշխանության և պետականության ամրապնդման գործում։
‹‹Ուժեղ Հայաստան›› կուսակցությունը կարևորում է նաև մեր երկրում ապրող ազգային փոքրամասնությունների կրթական,մշակութային, կրոնական իրավունքների պաշտպանությունը՝ հանուն մեր ընդհանուր հայրենիքի խաղաղ, ուժեղ և բարեկեցիկ ապագայի։
Շնորհավորում ենք Ազգային փոքրամասնությունների օրվա առթիվ››։
