Ռուսաստանի հարվածների հետևանքով Ուկրաինայի էներգետիկ ենթակառուցվածքները զգալի վնաս են կրել, հայտարարել է Վլադիմիր Զելենսկին։
«Ցավոք, էլեկտրացանցին և էլեկտրաէներգիայի փոխանցման կառույցներին մեծ վնաս է հասցվել», — գրել է նա սոցիալական ցանցերում։
Նա նաև պնդում է, որ իր գրասենյակը և երկրի արտաքին գործերի նախարարությունը պատրաստվում են դիմել Արևմուտքին հակաօդային պաշտպանության համակարգերի անհրաժեշտության քննարկման համար։
Հինգշաբթի օրը Ուկրաինական DTEK էներգահոլդինգը հաղորդել է Կիևում էլեկտրամատակարարման վթարային անջատումների մասին: Քաղաքում դադարեցվել է մետրոյի եւ վերգետնյա էլեկտրատրանսպորտի աշխատանքը։ Հոսանքազրկվել է նաև Գերագույն ռադայի շենքը։ Ուկրաինական ԶԼՄ-ների տվյալներով՝ քաղաքում տրանսպորտային կոլապս է սկսվել։ Հաղորդվել է նաև Կիևի ջրամատակարարման և կոյուղու համակարգերի աշխատանքի խախտման մասին:
Ավելի ուշ AFP-ն հայտնել է, որ Կիևի քաղաքապետը կոչ է արել Ուկրաինայի մայրաքաղաքի բնակիչներին ժամանակավորապես լքել քաղաքը։ Սակայն, ըստ գործակալության, Կլիչկոն ասել է, որ մայրաքաղաքը տարհանելու մասին խոսք չկա, բայց պատրաստվում են վառելիքի, ջրի և սննդի պաշարներ։
